სერიალის "ლაზიერის გამბიტი" მეორე სეზონს არ გადაიღებენ

Netflix–ის პროდიუსერმა, სკოტ ფრანკმა, განაცხადა, რომ პროექტის მეორე სეზონს არ გადაიღებენ. ამის შესახებ Deadine იუწყება. პროექტის მეორე პროდიუსერის, უილიამ ჰორბერგის თქმით, გუნდი ერთად მუშაობას გააგრძელებს, ამჯერად ახალ პროექტზე, ახალი ისტორიით.

„ლაზიერის გამბიტი“ Netflix-ის ისტორიაში ყველაზე პოპულარული მინისერიალი გახდა. პრემიერიდან 28 დღის განმავლობაში „ლაზიერის გამბიტის“ ნახვა რეკორდულმა 62 მილიონმა მომხმარებელმა გადაწყვიტა, რამაც ის დღეის მონაცემებით ყველაზე პოპულარულ მინისერიალად აქცია. ამასთანავე, სერიალი 92 ქვეყანაში საუკეთესო ათეულში მოხვდა, აქედან 63-ში პირველი ადგილი დაიკავა.

„ლაზიერის გამბიტი“ მოგვითხრობს 8 წლის ობოლ ბეთ ჰარმონზე, რომელიც გროსმაისტერობაზე ოცნებობს, თუმცა ამავე დროს ემოციურ პრობლემებსა და ნარკოდამოკიდებულებას ებრძვის. სერიალში მთავარი როლი მსახიობმა, ანია ტეილორ-ჯოიმ შეასრულა. „ლაზიერის გამბიტის“ პრემიერა 2020 წლის 23 ოქტომბერს შედგა.